राइजिंग स्टारकेँ फाइनल लेल चयनित भेली 'मैथिली ठाकुर', रवि दिन होयत फाइनल मुकाबला - मिथिला दैनिक

Breaking

सोमवार, 17 अप्रैल 2017

राइजिंग स्टारकेँ फाइनल लेल चयनित भेली 'मैथिली ठाकुर', रवि दिन होयत फाइनल मुकाबला

मधुबनी। 17 अप्रैल। पिछ्ला दुई मास सँ कलर्स टीवी चैनल पर सप्ताह मे दू  दिन शनि - रविकेँ रातिक 9 बजे सँ प्रसारित होमै बला सिंगिंग रियालटी शो ‘राईजिंग स्टार’ मे विजयी बनबाक सपना संजोना मैथिली ठाकुर एहि  प्रतियोगिता मे सभसँ बेसी वोट आनैत फाइनल राउंड लेल चयनित भ' गेल छथि। एहि प्रतियोगिता के फाइनल राउंड 23 अप्रैल आगामी रवि दिन  रातिक 9 बजे सँ होयत। सिंगिंग रियालटी शो 'राइजिंग स्टार' एक वास्तविक टेलीविजन गायन प्रतियोगिता केर भारतीय संस्करण अछि। ‘राईजिंग स्टार’ मे मिथिलाक बेटी 16 वर्षीय मैथिली ठाकुर अप्पन पहिल राउंड मे रिकॉर्ड (94%) मत आनबाक बाद निरंतर हरेक राउंड मे अपन प्रतिद्वंदी के पछाड़ैत फाइनल राउंड लेल अपन जगह सुनिश्चित कएलि। 
कैल्ह राति ‘राईजिंग स्टार’ के सेमीफाइनल मे मैथिली ठाकुर के मुकाबला विक्रम जीत सिंह संग छल। विक्रम जीत सिंह पिछला सभ राउंड मे विजय  रहला। मुदा, कैल्ह सेमीफाइनल मे मैथिली ठाकुर हुनको पछाड़ैत फाइनल राउंड लेल अपन जगह सुनिश्चित कएलि। ‘राईजिंग स्टार’ मे एक आओर राउंड होयत जाहिमे बेनेट केर मुकाबला अंकिता संग होयत। बेनेट आओर अंकिता मे जिनका बेसी वोट भेटत ओ सेमीफाइनल लेल चयनित होयत, जिनकर मुकाबला विक्रम जीत सिंह संग होयत। एहि सेमीफाइनल मे जिनका बेसी वोट भेटत ओ फाइनल राउंड लेल चयनित होयत, जिनकर मुकाबला मैथिली ठाकुर संग होयत। 
मैथिली ठाकुर एहि तरहे संघर्ष करैत एक एक स्टेप आगू बढ़ैत आय फाइनल तक पहुँच गेल छथि। हमरा लोकनि के मैथिली ठाकुर लेल आब आगामी रवि दिन वोट करवाक अछि। मैथिल दुलारी मैथिली ठाकुर वोट के कारण कही पाछा नहि होईथ। ताहिलेल लेल सभकियो मैथिली ठाकुर क' बेसी सँ बेसी वोट दी, ताकि मैथिली बने राइजिंग स्टार चैंपियन आओर मिथिलांचलक नाम चहुओर रौशन हुअ। अपनेक एक वोट बुच्ची मैथिली क' स्टार सँ सुपर स्टार बना सकैत अछि। मैथिली ठाकुर के एक बेर फेर अपने सभक आशीर्वादक जरुरत छैन्ह ताहिलेल सभकियो हुनका लेल फाइनल राउंड मे बेसी सँ बेसी वोट करि।