जिला प्रशासन द्वारा राज्य सरकार केर निर्देश पर 62000 लीटर अंग्रेजी शराब नष्ट काएल गेल - मिथिला दैनिक

Breaking

शनिवार, 19 अगस्त 2017

जिला प्रशासन द्वारा राज्य सरकार केर निर्देश पर 62000 लीटर अंग्रेजी शराब नष्ट काएल गेल

सहरसा। 19 अगस्त। जिला प्रशासन द्वारा राज्य सरकार केर निर्देश पर कैको बरख सँ सहरसा डिपो म' राखल 62000 लीटर अंग्रेजी शराब क' कैल्हि शुक्रदिन नष्ट काएल गेल। जिलाधिकारी केर निर्देश पर तैनात काएल गेल दंडाधिकारी केर रूप म' वरीय उप समाहर्ता सुनील दत्त झा केर  मौजूदगी म' शहर के हकपाड़ा शिवपुरी स्थित बिहार स्टेट बेवरेज कारपोरेशन लिमिटेड केर शराब डिपो म' पहिने सँ राखल स्टॉक क' नष्ट काएल गेल। 

डिपो प्रबंधक रमेश कुमार चौधरी कहलनि कि बरख 2013 म' खुजल एहि  डिपो म' राखल गेल शराब क' प्रशासनिक अधिकारी सभक देख रेख म' नष्ट काएल गेल। नष्ट काएल गेल विभिन्न ब्रांड केर 10250 पेटी शराबक अलावा 743 बोतल अंग्रेजी शराब सेहो शामिल छल। जाहिके डिपो केर  मुख्य द्वार पर नष्ट काएल गेल। नष्ट करबाक लेल बीयर केर बोतल सहित शराब केर बोतल क' जमीन पर एक जगह जमा काएल गेल आओर ओहिक ऊपर रोड रोलर चलाओल गेल।  

शराब क' नष्ट करबाक सूचना पर आसपासक गाम केर लोग सभक भीड़ ओता जमा भ' गेल लेकिन पुका पर मौजूद पुलिस बल सभके डिपो सँ बाहर क' देलनि। नष्ट काएल गेल शराबक कीमत खुला बाजार म' करीब दू  करोड़ सँ बेसी बताओल जे रहल अछि।

पहिल बेर जिला प्रशासन एतेक पैघ मात्रा म' शराब ' नष्ट करबाक कार्रवाई केलनि अछि। उत्पाद अधीक्षक रजनीश बतौलनि कि विभागीय नियमानुकूल शराब क' नष्ट काएल गेल अछि। एहि मौका पर डिपो प्रबंधक सहित सहायक लेखापाल उमेश चन्द्र मंडल, रमण, विनोद पासवान, उत्पाद विभाग केर अवर निरीक्षक प्रभुनाथ सिंह सहित सेप जवान मौजूद छलथि।