0


"अतीतक स्मृति"
************
हरिमोहन बाबू द्वारा लिखित चारिम चिट्ठी :
------------------------------
"हथुआ संस्कृत विद्यालय"
01.01.1949
आशीर्वाद,
हम दू मास सँ बड्ड जोर दुखित छलहुँ तैं चिट्ठी नहि दऽ सकलौं । अहाँ लिखैत छी जे बंगट बहुकें लऽकऽ कलकत्ता गेलाह । से आइकाल्हिक बेटा-पुतहु जेहन नालायक होइत छैक से तँ जानले अछि । हम हुनकाखातिर की-की नहि कयल । कोन तरहें बी.ए. पास करौलिएनि से हमहीं जनैत छी । तकर आब प्रतिफल दऽ रहल छथि । हम तँ ओहि दिन हुनक आस छोड़ल, जहिया ओ हमरा जिबिते मोछ छँटाबऽ लगलाह । सासुक कहबमे पड़ि गोरलग्गीक रूपैया हमरालोकनिकें देखहु नहि देलनि । जँ जनितहुँ जे कनियां अबितहिं एना करतीह तँ हम कथमपि दक्षिणभर विवाह नहि करबितियनि । 1500 गनाकऽ हम पाप कयल, तकर फल भोगि रहल छी । ओहिमेसँ आब पन्द्रहोटा कैंचा नहि रहल । तथापि बेटा बुझैत छथि जे बाबूजी तमघैल गाड़नहि छथि । ओ आब किछुटा नहि देताह आर ने पुतहु अहाँक कहलमे रहतीह । सेवा-सुश्रुषा करितथि । परञ्च ओ अहाँक इच्छाक विरूद्ध बंगटक संग लागलि कलकत्ता गेलीह । ओहिठाम बंगटकें 150 मे अपने खर्च चलब मोश्किल छनि कनियांकें कहाँसँ खुऔथिन । जे हमरालोकनि 30 वर्षमे नहि कएल से ई लोकनि द्विरागमनसँ 3 मासक भीतर कऽ देखौलनि । अस्तु, की करब ? एखन गदहा-पचीसी छनि । जखन लोक होइताह तखन अपने सभटा सुझतनि । भगवान सुमति देथुन । विशेष की लिखू ? कुपुत्रो जायेत क्वचिदपि कुमाता न भवति ।
देवकृष्ण
पुनश्च : जँ खर्चक तकलीफ हो तँ छओ कट्ठा डीह जे अहाँक नामपर अछि से भरना धऽकऽ काज चलाएब । अहाँक हार जे बन्धक पड़ल अछि से जहिया भगवानक कृपा होएतनि तहिया छुटबे करत !
*****************************

मिथिला दैनिक क' समाचार ईमेल द्वारा प्राप्त करि :

Delivered by Mithila Dainik

मिथिला दैनिक (पहिने मैथिल आर मिथिला) टीमकेँ अपन रचनात्मक सुझाव आ टीका-टिप्पणीसँ अवगत कराऊ, पाठक लोकनि एहि जालवृत्तकेँ मैथिलीक सभसँ लोकप्रिय आ सर्वग्राह्य जालवृत्तक स्थान पर बैसेने अछि। अहाँ अपन सुझाव संगहि एहि जालवृत्त पर प्रकाशित करबाक लेल अपन रचना ई-पत्र द्वारा mithiladainik@gmail.com पर सेहो पठा सकैत छी।

 
#zbwid-2f8a1035